တွေးမိတာလေးတွေ…………

တွေးမိတာလေးတွေ…………

မြို့တော်ကြီးမှ ယာဉ်စီးသူများ

ယာဉ်စီးတဲ့သူတွေအကြောင်းမပြောခင် မြို့တော်ကြီးအကြောင်းနဲနဲအရင်ပြောချင်ပါတယ်
အခုကျွန်တော်ရောက်ရှိနေထိုင်နေတာက
ကျွန်တော်တို့တတိယနိုင်ငံတွေထဲမှာဆိုရင်တော့ ခေတ်မှီ ဖွံ့ဖြိုးတိုးတက်ပြီးသားလို့ပြောရင်ရတဲ့
မြို့တော် ဘန်ကောက်ပါပဲ

ပြောချင်တာကတော့မြို့တော်ကြီးမှာနေထိုင်ကြတဲ့လူတန်းစားတွေအကြောင်းပါ
ဟုတ်ကဲ့ စကားမကျန်အောင်ပြောရရင်
လူတန်းစားဆိုတဲ့ စကားလုံးကိုလဲ ကျွန်တော်မုန်းပါတယ်
ထားပါတော့

မြို့တော့ကြီးမှာ လူတန်းစားအများကြီးရှိပါတယ်
ဒါပေမယ့် ဒီမှာတော့ ခေါင်းစဉ်နဲ့ဆိုင်တာလေးတွေပဲပြောပါ့မယ်

ပထမဆုံးပြောချင်တာက
မြို့တော်ကြီးက ရထားစီးသူများပါ
အဓိက ကတော့ နှစ်မျိုးရှိပါတယ်
ကဒ်ပြားသုံးပြီးစီးသူများနဲ့ အကြွေစေ့သုံးပြီးစီးသူများပါ
(အမြင်မတူတာတွေ ရှိနိုင်ပါတယ် ကျွန်တော်ကတော့ မြင်သလိုနဲ့ ပြောတတ်သလိုပဲပြောပါမယ်။ ကျေနပ်စွာ သဘောထားကွဲလွဲခွင့် ရှိပါတယ်၊ လူ့အခွင့်အရေး ဆိုတဲ့စကားလုံးကို နားလည်အောင်လေ့လာနေပါတယ်)
စကားပြန်ကောက်ရရင် ရထားစီးသူများမှာမှ
တချို့က လပေးကဒ်နဲ့စီးပါတယ် အဲဒီလူတွေကိုကျွန်တော်က ကဒ်ပြားနဲ့စီးသူများလို့ခေါ်တာပါ
လပေး ကဒ်မှာမှ နှစ်မျိုးရှိပါသေးတယ်
အကြိမ်အရေအတွက်နဲ့စီးတာနဲ့ ခရီးအကွာအဝေးနဲ့စီးတာပါ
နားရှုပ်သွားလား
ဒီလိုလေ
ပထမ တမျိုးက ဘယ်လောက်ဝေးဝေး စီးစီး သတ်မှတ်ထားတဲ့အတိုင်းပဲဖြတ်တယ်
၂၀ ၊ ၂၅ ဘတ် စသဖြင့်ပေါ့
ဒုတိယ တစ်မျိုးကတော့ ခရီးအကွာအဝေးပေါ်မူတည်ပြီးမှ ဖြတ်တာလေ
ဘယ်နှစ်မှတ်တိုင်ကို ဘယ်လောက် စသဖြင့်ပေါ့

နောက်တမျိုးက အကြွေစေ့ သုံးပြီးစီးသူများပါ
ခရီးအကွာအဝေး အလိုက် အကြွေစေ့လဲ ပြီးကဒ်ပြားဝယ်စီးတာပါ

စကားမစပ် အခုပြောနေတာ မိုးပျံရထား အကြောင်းပါ
ကျွန်တော်နေ့တိုင်း အလုပ် အသွားအပြန်စီးရပါတယ်
တခြားအနေနဲ့ မြေအောက်ရထား နဲ့ ပုံမှန်မြေပေါ်မှာတင်သွားတဲ့ရထား (ကျွန်တော်တို့ဆီမှာတော့ မြို့ပတ်ရထားလိုဟာပေါ့) နှစ်မျိုး ရှိပါသေးတယ်
ကျွန်တော်ကတော့ နေ့စဉ်ထိတွေ့နေရတဲ့ မိုးပျံရထားအကြောင်းပဲပြောမှာပါ

နေ့စဉ်ရုံးတက်ရုံးဆင်းချိန်ဆိုရင် ရထားကလူအရမ်းကြပ်ပါတယ်
ကျွန်တော်တို့ဆီက ဘတ်စ်ကားနဲ့နင်လားငါလားပါပဲ
လေအေးပေးစက်ဖွင့်တာနဲ့ မဖွင့်တာပဲကွာပါတယ်
အခုဒီစာရေးဖြစ်တာကလဲ ဒီနေ့ရထားပေါ်မှာတွေ့ခဲ့ရတဲ့လူတွေကြောင့်ပါ
နိဒါန်းကချီရင်းနဲ့များသွားတာ

ခန္ဓာကိုယ်မှာ အပေါက်ဖောက်ကြသူများ

ကောင်လေးတစ်ယောက်ကဆိုရင်နားမှာ နားကွင်းတတ်ထားပါတယ်
ဟုတ်ကဲ့ ပုံမှန်ဆိုရင်တော့ ဒီခေတ်ကြီးထဲမှာနားဖောက်တာဘာမှမထူးဆန်းပါဘူး
စကားလုပ်ပြောနေတဲ့ကျွန်တော်ကမှ ထူးဆန်းနေနိုင်ပါသေးတယ်
(ဘာကြောင်တာလဲပေါ့နော်)
ဒါပေမယ့် အဲဒီကောင်လေးက သူ့ရဲ့နားသံသီးမှာအကွင်းအကြီးကြီးတတ်ထားတာပါ
၅ ဘတ်စေ့လောက်ရှိတဲ့ ကွင်းအကြီးကိုဖောက်ပြီးတတ်ထားတာပါ
(၅ ဘတ်စေ့ မမြင်ဘူးသူများအတွက် မှန်းရလွယ်အောင် ၅မူးစေ့ကိုမြင်ယောင်ကြည့်နိုင်ပါတယ်)
သူ့နားက ကွင်းကြီးနဲ့ ဘေးသားနဲနဲပဲကျန်တော့တယ်လေ
နှစ်ဘက်စလုံးပါ ကြည့်ရတာအသည်းယားလိုက်တာ
နောက်ကောင်မလေးတစ်ယောက်ကကျတော့ နားမှာဖောက်ထားတာ
လေးပေါက်ပါ (ကျွန်တော့်မှာလဲ လေးပေါက်ဖောက်ထားတဲ့အစ်မတစ်ယောက်ရှိဖူးပါတယ်)
သူတို့ဘယ်လိုစိတ်ကူးနဲ့ ဒီလောက်အပေါက်တွေအများကြီးဖောက်ကြတယ်ဆိုတာမစဉ်းစားတတ်ပါဘူး
အင်းလေ အမှန်ကကျွန်တော်ကိုယ်တိုင်ကဘယ်လိုစိတ်ကူးနဲ့ဒီစာကိုရေးနေသလဲဆိုတာ
အရင်စဉ်းစားရမယ်ထင်တယ်
သီချင်းတစ်ပုဒ်ထဲမှာတော့ နားပေါက်တစ်ပေါက်ဟာ အသည်းတစ်ခါကွဲဖူးခြင်းကိုကိုယ်စားပြုတယ်လို့တော့ဖတ်ဖူးတာပဲလေ
အဓိကပြောချင်တာက ကျွန်တောတို့်ရဲ့ Y2K Generation လို့ခေါ်တဲ့
တချို့ကလဲ Me Generation လို့ခေါ်တဲ့ မျိုးဆက်မှာဘာတွေဖြစ်ကုန်ပြီလဲလို့တွေးမိတာပါ
ကျွန်တော်လဲ လူငယ်တစ်ယောက်ပါပဲ (အသက်အပိုင်းအခြားအရတွက်ရင်ပြောတာပါ)
ဒါပေမယ့် ခံစားလို့မရဘူးဗျ

ဆေးမှင်ကြောင် လို့ခေါ်တဲ့ Tattoo

ဒါကိုတွေးမိတာကလဲ ဘေးနားကလူတစ်ယောက်ကြောင့်ပါ
သူ့လက်မှာရေးထားတာက BELIEVE IN MYSELF ပါ
ဒါပေမယ့် ဆေးမှင်ကြောင်ဆရာရဲ့ကောင်းမှုကြောင့် BELLEVE IN MYSELF ဖြစ်နေပါတယ် သူ့ကိုယ်သူလဲသိပုံမပေါ်ပါဘူး
လူတွေအမျိုးမျိုးကအတွေးတွေ အမျိုးမျိုးနဲ့ Tattoo ထိုးကြပါတယ်
ရုပ်ရှင်တွေထဲမှာဆိုလဲ မင်းသားတွေထိုးထားရင်မိုက်မိုက်ကန်းကန်းပုံစံနဲ့ကြည့်ကောင်းပြီး
မင်းသမီးထိုးထားရင်လဲ လိင်ဆွဲဆောင်မှုအလွန်ရှိပါတယ် နေရာကိုမူတည်ပြီးတော့ပေါ့လေ
ကျွန်တော်လဲ တခါတခါ Tattoo ထိုးဖို့စဉ်းစားကြည့်ပါတယ်
နာမှာကြောက်တာရယ် ပြန်ဖျက်လို့မရနိုင်တာရယ်ကိုတွေးပြီး မထိုးဖြစ်ပါဘူး
သူငယ်ချင်းတစ်ယောက်ကတော့ပြောတယ် ထိုးတယ်ဆိုတာ
တစ်ဘ၀လုံးနဲ့ဆိုင်တဲ့ ကတိက၀တ် တစ်ခုပဲတဲ့
(သူက English လို Commitment ဆိုတဲ့စကားလုံးသုံးသွားပါတယ်)
နောက်တစ်ခါ အရက်မူးမှသွားထိုးအုံးမယ်လေ

ပိတ်ဆို့တတ်သူများ

ဒီမြို့တော်ကြီးကိုရောက်မှ ကျွန်တော် စ ရင်းနှီးရတဲ့ လူတန်းစားတစ်ရပ်ပါ
ဒီလိုပြောရတာက ကျွန်တော် အရင်နေခဲ့တဲ့မြို့ကြီးမှာ ဒီလိုလူမျိုးတွေသိပ်မတွေ့ဖူးလို့ပါ
မရှိလို့တော့မဖြစ်နိုင်ဘူး နဲတာဖြစ်ပါလိမ့်မယ်
သူတို့တွေက ရထားစီးဖို့တက်ရတဲ့ စက်လှေခါးမှာပိတ်တတ်သလို
ရထားဝင်ပေါက်မှာလဲပိတ်တတ်ပြန်ပါတယ်
အဲဒီလိုလူတွေကိုပဲ ကုန်တိုက်ကြီးတွေမှာတွေ့ရပြန်တဲ့အခါ
ပိတ်ဆို့ခြင်းကိုပဲ ဒီနိုင်ငံရဲ့ယဉ်ကျေးမှု တစ်ခုများလားလို့
ဝင်ဝင်လာတဲ့အတွေးကို တော်တော်မောင်းထုတ်ရပြန်ပါတယ်

A Chen
07:45 pm
9th January 2009
Starbucks coffee shop
Phaya Thai
Bangkok